VÍN 7. apríl 2004
Þar sem enginn hefur lagt í að fjalla um síðasta matarklúbb, eða fjallað um nokkuð yfir höfuð, þá skal ég taka það að mér að þessu sinni. Landið að þessu sinni var Páskaeyja sem er austasti hluti pólinesísku eyjanna í Austur-Kyrrahafi. Verður að segjast að landið sé vel valið (klassa tímasetning) og var boðið því í bland hefðir frá Páskaeyju og íslenskir páskasiðir, því að á boðstólum var íslenskur páskabjór, tortilla kökur og snittur í forrétt (fékk reyndar aldrei að smakk þessar tortilla kökur). Í aðalrétt voru grillaðar lambalærissneiðar með grilluðum kartöflum og maís ásamt fersku salati (sem náði nýjum hæðum með furuhnetunum). Allt saman afar ljúfengt og segja má að Einar Andri hafi komið mjög á óvart því að hann er ekki þekktur fyrir mikla reynslu í eldamennskunni en Þorgeir verður að teljast meiri reynslubolti. Eftirrétturinn var einnig mjög góður, en það var grillaður banani með snikkers, ís og rjóma. Nægur mjöður var á svæðinu sem er þeim félögum til framdráttar. Því gef ég þeim félögum Einari Andra og Þorgeiri Arnari fjórar stjörnur af fimm sem verður að teljast mjög gott.

Yfir í annað, þá lærði ég nýtt orð í gær, þetta er orð sem lýsir e-u sem er flott, töff eða kúl... og aðeins örfáir vita hvað þýðir, þar til nú. Þetta orð var notað fyrir mörgum árum eða einum 10-15. Orðið lærði ég þegar ég fékk yfirfarna skýrslu frá kennara mínu í Tölvuvæddri hönnun og var það skrifað fyrir neðan mynd af hönnuninni minni. Jæja þá, orðið er SMÆKÓ, ég legg til að allir fari að nota þetta orð þegar þeir lýsa hrifninu sinni á e-u.

Af áskorun
Í gærkvöldi fór ég á myndbandaleiguna með keppendum áskorunarinnar miklu. Ekkert voðalega merkilegt í sjálfu sér, allir geta leigt video spólu! Við komum okkur fyrir í mjúkum hægindastólum á heimili Jóhanns og byrjuðum að horfa. Keppendurnir kvörtuðu yfir miklu álagi undanfarna viku og áður en ég vissi af voru þeir báðir steinsofnaðir yfir miðri mynd. Fyrir ári síðan hefði það verið ég sem hefði sofnað fyrstur. En hver er ástæðan fyrir þessu mikla álagi á strákunum, jú það eru 5 dagar í að áskorunin fari fram og auðvitað nýta þeir allan sinn litla frítíma til þess að æfa sig og eru að sjálfsögðu mikið þreyttir þessa dagana auk þess þá fylgir því eflaust mikið álag að taka þátt í keppni sem þessari. En af veðbankanum er það að frétta að eins og er þykir Krissi örlítið sigurstranglegri en munurinn er innan skekkjumarka.

Rakst á umfjöllun um ferð handboltaliðs FH á Akureyri um helgina á fhingar.is:

“Heimferðin gekk mjög vel en pissupollarnir eru víst allnokkrir á þjóðveginum það var nefnilega ekkert vatn í klósettinu í rútunni og það var alveg merkilegt hvað menn þurftu oft að tæma blöðruna á leiðinni heim hmmm...

Annars erum við strákarnir bara glaðir yfir ágætisgengi undanfarnar vikur og hlökkum til að sjá ykkur FH-inga á miðvikudaginn þegar við spilum við HK í umspilinu og þá þarf að styðja við bakið á okkur þar sem við getum verið ansi brothættir og er það undir ykkur komið að halda okkur gangandi inná vellinum!!”

Úff… Ég ætlaði að skrifa helling og níða svona hugarfar í svaðið en ég á bágt með það. Hristi bara hausinn í staðinn. Vona að utandeildarhugsunarhátturinn verði geymdur heima er menn mæta í leikinn gegn HK á miðvikudaginn…

Þegar ég var lítill kunnu krakkar ekkert á hljóðfæri. Ja, þeir sem kunnu það voru flestir lagðir í einelti fyrir vikið. Munum t.d. flest eftir Jóa túbu og Fiðlu-Baldri. Ekki þóttu það merkilegir pappírar. Sem betur fer er þróunin önnur í dag. Nú kann annar hver krakkagemlingur á gítar eða trommur og allir eru í hljómsveitum. Í vetur sýndi einn guttinn sem ég er að þjálfa mér trommusettið sitt. Hann spilar ávallt á settið með massívan kappaksturhjálm á hausnum því hann á til að lemja sig firnafast í höfuðið í trommusólóum. Sá káti piltur kunni líka á gítar og var í tveimur hljómsveitum. Önnur þeirra, Gallafötin, er reyndar eiginlega hætt.

Einnig er vert að minnast þriggja félaga sem tjáðu mér um daginn að þeir kæmust ekki á næstu fótboltaæfingu þar sem þeir væru að fara í stúdíó. Níu ára gaurar! Þegar ég var níu ára var ég borðandi sand og safnandi fótboltamyndum... Milli þess sem ég henti eggjum í hús Jóa túbu og Fiðlu-Baldurs.

Síðasta dæmið er svo enn annar gaur sem ég er að þjálfa. Sá gerðist það brattur að mæta heim til mín áðan, aðallega til að segja mér frá rafmagnsgítarnum sem hann langar í. Ég missti úr mér að ég ætti nú svoleiðis apparat sem hann vildi ólmur skoða. Kemur í ljós að kauði er betri en ég á gítar, enda forsprakki sveitarinnar Þrír sykurpúðar. Það var nokkuð magnað að sjá hvað gaurinn var öflugur á gítar en ennþá magnaðri er sú staðreynd að ég náði einhvern veginn að halda hlátrinum inni í mér er hann sagði mér hljómsveitarnafnið.

Allavega, það sem ég er að reyna að segja er að ég hef ákveðið að hætta í hljómsveitinni Görlíbojs. Danni, Jói... Þetta var skemmtilegt ferðalag en ég tel að hæfileikar mínir njóti sín betur í herbúðum Þriggja sykurpúða (sem líklega verða orðnir fjórir ef ég bætist við). Ég þakka ykkur fyrir samstarfið og ítreka að ég mun alltaf bera virðingu fyrir ykkur sem listamönnum.

Ummæli Jóa í e-u kommenti hér fyrir neðan hafa kallað á enn eina stórkeppnina hér á pagecannotbefound.com. Glöggt fólk man ugglaust eftir þegar ég vann Jóa í þrautinni að stilla upp fótboltaliði með sjálfum okkur innanborðs, þegar ég tók selina í hundabeinsstríði alþingismannanna og þegar Jói vann strandblaksmót kviðmága (siðvöndun okkar hinna gerði að verkum að við tókum ekki þátt).

Nú fer önnur eins skemmtiskúta af stað sem snýst um leiðinlegustu kvikmynd sögunnar. Jói hafði áður bent á Plump Fiction en eftir að hafa hugsað um að flagga t.d Johnny Mnemonic, Look who’s talking too og Star Trek V: THE FINAL FRONTIER kaus ég að velja hina ógeðslegu Kevin & Perry Go Large sem ég horfi einu sinni á, að ég held með Danna. Toppið það, gígalóar.

Til að auka á fjölbreytnina hef ég skyndilega ákveðið að mótið verði tvíþætt að þessu sinni og felist líka í því að velja hrokafyllsta fuglinn. Minn fugl er dílaskarfur. Sigurvegarinn þarf semsagt að vera fremstur á báðum vígstöðvum.

Annars eru þau tíðindi af mér að engin þjálfun, miðar vegna þjálfunar, verkefni eða skóli hvíldu á mér í dag svo ég gerðist svo brattur að kneyfa mjöð um hálfþrjú. Dagdrykkja er gríðarlega vanmetið fyrirbæri og ákveðið tabú á Íslandi (ef við myndum ímynda okkur að Raufarhöfn væri ekki á Íslandi). En jæja, Kevin & Perry Go Large og dílaskarfur og tel ég klárt mál að sigurganga mín haldi áfram.

Í gær fékk ég ömurlegar fréttir og ekki bara eina heldur tvær...
Í fyrsta lagi kom í ljós að ég er ekki að fara á fótboltaleik í útskriftarferðinni af því að það fást engir miðar.
Í öðru lagi þá þarf að borga útskriftarferðina fyrir 14. apríl(shit shit*) og ég nýbúinn að borga rándýra viðgerð á bílnum mínum... það versta er að ég hélt að e-r söfnunarpeningur kæmi í hús fyrir fyrstu borgun en svo reyndist ekki vera...(shit shit shit**)
Þannig að í dag líður mér ekki vel og mér er illt í hendinni eftir þrjár bólusetingasprautur (sem kostuðu tæpan 7000 kall)
*(berið fram með frönskum hreim)
**(berið fram með því að halda fyrir nefið og tala afturábak)

Ég byrgi þetta ekki inni mikið lengur. Sjónvarpsþátturinn Landsins snjallasti á Skjáeinum er versti sjónvarpsþáttur sem gerður hefur verið. Hugmyndin um það að skutla lesbíunni Rósu í settið með slatta af púðum og tómatsafa er betri. Þátturinn þar sem gaurinn úr Hellisbúanum lék sínöldrandi og óþolandi kerlingarskrukku sem hét Bára var betra sjónvarpsefni.

Hvaða bjáni gerist svo bíræfinn halda að það að borða búðing sé gott sjónvarpsefni? Hvaða gáfumaður telur einn léttan leik af samstæðuspilinu auka áhorf? Að raða kúlum í rétta röð eftir lit! Er verið að hæðast að okkur? Spilar einhver samstæðuspilið? Og hvað er málið með þessa glyðru? Hún er svo ótalandi, vélræn og vandræðaleg að maður finnur til með henni.

Því spyr ég: Hefur fólk e-n tíma séð verri þátt en þennan? Getur fólk ímyndað sér sjónvarpsþátt sem gæti mögulega verið verri en þessi? Er þetta löglegt?

Örvænting
Svo virðist sem keppendur áskorunarinnar séu að fyllast örvæntingu og trúleysi á eigin getu. Báðir aðilar gera fátt annað þessa dagana en að afsaka sig og nýjasta ráðið hjá þeim félögum fellst í því að skora á mig til þess að taka einnig þátt í þessari áskorun!!! Þetta lýsir þessari örvæntingu sem virðist ríkja í hugum keppenda, þetta er svo gegnsætt hjá ykkur "hei, bjóðum feita seina gaurnum að vera með, við vinnum hann pottþétt!!!", hversu lélegt er þetta, þið eruð aumkunarverðir!!!
En þið megið búast við því að ég verðir fyrstur að mæta að horfa á annan ykkar taka þátt í kvennahlaupinu!!!

REGLUR
Hér eru reglur sem snúa að hlaupinu.

1. Einungis er heimilt að keppa á skóm með háum hæl, lágmark 4cm
2. Keppendur skulu vera í mislitum keppnisgöllum svo að auðveldlega megi greina á milli þeirra.
3. Aðeins er leyfilegt að taka eina vatnspásu á meðan hlaupi stendur.
4. Keppendur skulu mæta a.m.k. 15 mínútum fyrir hlaup til þess að koma í veg fyrir seinkun á móti.
5. Öll meðferð kóladrykkja og sælgætis er stanglega bönnuð á mótsstað.
6. Öll meðferð áfengis og annarra vímuefna er æskilega á mótsstað.
7. Óheimilt er að láta annan en skráðan hlaupara hlaupa í áskoruninni.
8. Ef keppandi er lengur en 60 sek. að hlaupa 400 metrana þá þarf hann að hlaupa 10km í kvennahlaupinu næsta sumar, óháð því í hvaða sæti hann er.
9. Brot á þessum reglum gerir keppanda samstundis brottrækan úr áskorun og þarf hann að afplána dóm sinn með þáttöku í kvennahlaupinu næsta sumar.

Framkvæmdarstjórn Áskorunarinnar miklu

ÁSKORUNIN MIKLA!!!
Stöðugt styttist í að áksorunin mikla fari fram...
Eftir fleirri stöðubirtingar á gengi æfinga hefur Jóhann tekið forystu með 42% atkvæða á móti 32% atkvæðum sem Kristmundur hefur hlotið!!! Enn geta lesendur haft áhrif á veðbankann með því að kjósa hér til hliðar.
Sjáum hver sigrar að lokum og hleypur meðal miðaldra kvenna á meðan aðrir fylgjast með og drekka öl.

Áskorunin mikla - Fréttir af undirbúningi

Þegar ég var búinn að þjálfa í dag ákvað ég að taka smá skokk til að ég vinni Krissa örugglega í Áskoruninni miklu. Ég ákvað að skokka að bóndabæ einum er Sveinungsvík heitir, minnti að það væri hæfilega langt.
Ég fór af stað og komst brátt að því að það er svolleiðis miklu lengra í Sveinugsvík en mig minnti. Þar að auki var sterkur vindur og brattar brekkur á leiðinni.
En ég ákvað að láta ekki deigan síga og hélt mig við fyrri áætlun. Einum og hálfum tíma síðar skreið ég inn á Raufarhöfn aftur, nær dauða en lífi. Komst að því að ég hafði tekið einhverja rúma 10 kílómetra!!!
Skemmst er frá því að segja að þegar ég kom heim titraði ég allur og skalf og enn er ástand mitt hræðilegt.
En ég hugga mig þó við það að Krissi gæti aldrei skokkað tíu kílómetra þó að hann fengi róbóta með slími fyrir það...
Undirbúningur fyrir Áskorunina miklu er því kominn á fullt skrið og Krissi má aldeilis passa sig.

joiskag

Babbarabú. Miðvikudagur er mættur og því komið að tónlistargetrauninni. Verði ykkur að góðu.

Hverjir sungu og af hvaða snilldarplötu er þetta nú?
“Caught by the fuzz
Well I was
Still on the buzz
In the back of the van
With my head in my hands
It's like a bad dream
I was only 15
If only my brother could be here now
He'd get me out and sort me out alright
I knew I should have stayed at home tonight”

Hvað heitir bandið og hvað heitir platan?
“Sit beside a mountain stream – see her waters rise.
Listen to the pretty sound of music as she flies.
Find me in my field of grass –
Mother Nature’s son.”

Hvert er þetta band og hvert er þetta lag?
“If you should ever leave me
Though life would still go on believe me
The world could show nothing to me
So what good would living do me”

Í lokin er það jú súkkulaðikleinan. Minni á að henni má maður ekki svara nema maður heiti Þorgeir Arnar. Kleinan hljómar svo:
Hvaða hljómsveit gerði Bítlaplötuna Beatles for sale?

Einvígi spóaleggjanna
Undirbúningur Krissa - 1. hluti

Óhætt er að segja að undirbúningurinn fari brösulega af stað. Hef tvisvar farið að skoða hlaupabrautina í Krikanum en lítið hlaupið ennþá, meðal annars hætt við vegna magaverks og lélegs skóbúnaðar. Ég tel fullvíst að ef við værum að keppa í afsökunarkeppni myndi ég taka Jóhann í óæðri endann. Já, sama enda og maðurinn reyndi að leigja um árið á Hansen.

Síðustu dögum hef ég aftur á móti einkum eytt í fuglaskoðun og fengið úr henni fína hreyfingu. Ég hef mikið spekúlerað í hlaupastíl ýmissa fugla og reynt að læra af þeim. Sérstaklega þykir mér mikið til koma hlaupalags spóans og mun reyna að tileinka mér það eins fljótt og auðið er. Hraðar fótahreyfingar einkenna það og mun ég lítið beita hnjánum, sem hafa einmitt lengi verið minn akkilesarhæll. Gæsir þykja mér hlaupa hægt og mun ég forðast að hlaupa eins og þær. Þá er hlaupalag skúfandarinnar alveg út í hött.

Það er einnig ljóst að mitt helsta tromp í einvíginu verður markviss sálfræðihernaður. Ég ætla fyrst að segjast vera búinn að æfa þrisvar á dag undir stjórn Mumma Karls en byrja svo að haltra eins og sjóræningi þremur dögum fyrir hlaup. Í hlaupinu sjálfu mun ég svo láta eins og ég sé með Parkinson-veikina. Þessi aðferð gæti dugað til sigurs en byggir þó á nógu góðri upphitun á páskadag.
Loks kem ég til með að treysta mikið á heppni í undirbúningnum. Ég hef enga trú á næringarfræði enda á allra vitorði að eitt hamborgaratilboð á dag hamlar gegn grasofnæmi.

Þrátt fyrir örfá skakkaföll er ég bjartsýnn. Nægur tími er til stefnu og þó Jói hafi það framyfir mig að hafa e-n tíma hlaupið 400 m hlaup vil ég meina að ég hafi ákveðið sálfræðilegt forskot. Hvað sem verður heiti ég því að ef ég tapa á páskadag mun ég gera mitt besta við að vinna Kvennahlaupið.

Fréttir af æfingunum
Daníel skoraði á okkur Krissa að birta hér á blogginu fréttir að æfingum fyrir veðmálið mikla. Rifjum aðeins upp um hvað það snýst fyrir nýja lesendur. Krissi skoraði á mig í 400m hlaup á páskadagsmorgun kl. 10:00. Sigurvegarinn labbar burtu með einn kass af bjór, en sá sem tapar þarf að taka þátt í Kvennahlaupinu í sumar.
Það er því ljóst að það er til mikils að vinna.

Persónulega get ég ekki sagt að æfingar hafi verið stífar hjá mér þar sem ég býst ekki við að þufa að hlaupa þetta hlaup. Við þekkjum öll meiðslasögu Krissa og ég þori að veðja að hann meiðist fyrir hlaupið, ja allavega á hann eftir að þykjast hafa meiðst því hann veit að hann getur ekki unnið mig.
Ég treysti aðallega á forna frægð á frjálsíþróttvellinum. Kristmundur man eflaust ekki eftir því að 400m hlaup var mín sérgrein á árum áður, varð m.a. íslandsmeistari í flokki 19-22 ára þegar ég var 19 ára. Haha!!
Fornum afrekum mínum til staðfestingar birti ég hér smá brot úr metaskrá frjálsíþróttasambands Íslands sem sínir svart á hvítu þrjú glæsileg íslandsmet, m.a. eitt í 400m hlaupi.

Drengir 17 - 18 ára - Utanhúss
4x100 metra boðhlaup 44,6 Sveit FH FH Reykjavík 15/09/97
(Björn B. Björnsson, Aron F. Lúðvíksson, Jóhann Skagfjörð, Sveinn Þórarinsson)
4x200 metra boðhlaup 1:35,2 Sveit FH FH Reykjavík 15/09/97
(Björn Bragi Björnsson, Aron F. Lúðvíksson, Jóhann Skagförð, Sveinn Þórarinsson)
Sveinar 15 - 16 ára - Utanhúss
4x400 metra boðhlaup
3:43,8 Landssveit ISL Reykjavík 24/10/97
(Björgvin Víkingsson FH, Stefán Ág. Hafsteinsson ÍR, Jóhann Skagfjörð FH, Ívar Örn Indriðason Á)

Ég trúi því statt og stöðugt að ég þurfi engar æfingar til að sigra Krissa. Forn frægð mín á þessum vettvangi mun tryggja mér öruggan sigur og kassa af bjór.

joiskag

Vona að þetta áfall þitt, Krissi, verði ekki til þess að þú missir dampinn við þjálfunina fyrir áskorunina... En vegna þessa hrikalega atviks legg ég til að við tökum höndum saman og styrkjum Krissa með söfnun, því að þrátt fyrir stórt tilfinningalegt áfall þá er einnig um töluvert fjárhagstjón sem hlýst af atburði sem þessum. Krissi þú setur reikningsupplýsingar bara sem komment!
Maður skilur bara ekki svona hugsanagang að ef mann vanta pening þá sé besta ráðið að brjótast inn í bíla og rústa þeim fyrir nokkra þúsundkalla, áhætta sem er vel þess virði og samviksuleysið við að valda öðrum tjóni??? "Greinilega bara best að skilja bílinn eftir ólæstan" þá eyðileggst allavega ekkert...

Yfir í annað! Þá er spurning um að fá stöðu á því hvernig keppendum áskorunarinnar gengur að koma sér í form. Vona að enginn sé að kikkna undan þessari litlu keppni...
Ekkert hefur heyrst í 1000. gestinum!!!

Af glæpum

Stundum hef ég heyrt talað um óprúttna menn sem koma öðrum fyrir kattarnef með því að hnupla og eyðileggja. Ég hef meira að segja stundum heyrt um glæpaöldur. Hingað til hef ég hins vegar bara hlegið strákslega og farið með gamanyrði þegar ég heyri eins fjarlægar sögur. En það gamla strákslega sakleysi mitt dó í dag.

Þegar ég var búinn að þjálfa í Víðistaðaskóla kom á daginn að einhver hafði brotið rúðu í bílnum mínum, mölvað miðstöðina, stolið geislaspilaranum og allavega fimmtán diskum. Seinna kom í ljós að ribbaldarnir höfðu einnig tekið skólatöskuna mína sem hljóðkerfisfræðiprófessorinn minn fékk einhverra hluta vegna og geymir heima hjá sér. Sá durgur hringdi einmitt í mig í kvöld vegna þessa og gruna ég hann sterklega um verknaðinn.

Ég bombaði mér í snatri á löggustöðina og þar tók skondinn haukur á móti mér og ekki byrjaði hann með stæl. Fyrstu orð hans voru:
“Já... ég er samt ekkert að vinna hérna... sko, málið er að árshátíðin hjá löggunni er í kvöld og ég er bara á þessari einu vakt.” Í kjölfarið sagði hann um glæpinn:
“Jájá, þetta eru sko atvinnumenn. Þetta hefur tekið innan við mínútu... nokkrar sekúndur bara... bara inn og út.” Á þessum tímapunkti þurfti ég að bíta fast í kinnina á mér svo ég springi ekki úr hlátri. En svo kom reyndar í ljós að gaurinn var mesti fagmaður og hörkulögga. Vann bara yfirleitt annars staðar. Við áttum einmitt innilegt spjall í sama yfirheyrsluherbergi (bara venjuleg skrifstofa en hitt hljómar betur) og við Danni vorum í er við vorum 14 ára opptúnógúdvillingar.

Allavega. Andskoti vorkennir maður slíkum aumingjum sem finna sig knúna til að brjóta rúðuna mína og rústa bílnum mínum. Hvernig sofa svona menn? Hvernig geta þeir farið fram úr á morgnanna? Djöfull hlýtur þeim að líða illa.

Tók samt mynd af rústunum sem blöstu við er ég kom að bílnum enda var ég í því að taka myndir af FH-ingum mánaðarins hjá 6. flokki. Myndina getið þið ekki séð “HÉR” vegna þess að ég kann ekkert á tölvur.

"Maggi eipaði"

Var að kíkja á this.is/fh og lesa um leik FH og Fram sem fór 2:1 fyrir okkur fimleikamönnum.
Allan og Ármann skoruðu FH mörkin en Framarar úr víti eftir að Maggi netverji hafði brotið á einhverjum kappa.
Segir um þetta á síðunni:

Á 33. mínútu dró svo aftur til tíðinda þegar dómarinn geðþekki, Garðar Örn Hinriksson, dæmdi víti á FH eftir að Andri Steinn hafði þvælst eitthvað í lappirnar á Magga. Maggi "eipaði" gjörsamlega"

Eins og ég þekki Magga þá er hann rólyndismaður og því kom þetta mér á óvart.

Í kjölfarið hef ég nokkrar spurningar fyrir Magga:

i) Hvað er að eipa gjörsamlega?
ii) Ætlarðu oft að gefa víti í leikjum, ef svo er nenniru þá að fara í KR?
iii) Megum við eiga von á því að þú eipir einhverntímann á okkur í matarboði af því að maturinn var ekki nógu góður?
iv) iVarstu pirraður út í dóminn eða bara að því að það er langt síðan þú hefur fengið að ríða?

bara forvitni

Kæri Jóhann.

Ég vorkenndi þér þegar ég frétti að þú flyttir á Raufarhöfn, staðinn sem ekki einu sinni rottur heimsækja nema til að deyja.

Ég vorkenndi þér þegar ég frétti að enginn hiti væri í íbúðinni þinni og þú þyrftir að sofa dúðaður eins og Ikingut litli.

Ég vorkenndi þér þegar ég frétti að vegna ófærðar væri engan mat að hafa á Riben og þú værir byrjaður að naga gólfteppi til að sporna gegn næringarskorti.

En nú berast fréttir þess efnis að þú, fullorðinn maðurinn, sért byrjaður að spila jatsí sjálfviljugur. Þú veist hvað þeir segja um jatsí, eitt jatsíspilerí er tilviljun – tvö er hegðunarmynstur. Áhyggjur mínar af þér hafa stóraukist.
Jatsí er leiðinlegasta spilið. Enginn maður sem spilar jatsí getur talist ganga heill til skógar. Þegar refsa átti ósamvinnuþýðu búaliði á tímum Stalíns var jatsí hluti af píningunum. Þegar draga átti sannleikann upp úr Atla Helgasyni var hann látinn spila jatsí.

Með þessar staðreyndir í huga hef ég ákveðið að bjóða mig fram og taka við afplánun þinni á Riben. Hér með býðst ég til að taka við starfi þínu sem grunnskólakennari á Raufarhöfn og get hafið störf strax á mánudaginn.

Með von um skjót viðbrögð,
Kristmundur

Halló hundar

Kannist þið við þegar maður fer á hverjum degi inn á ákveðna síðu og hlakkar til að sjá eitthvað skemmtilegt lestrarefni?
Þessi síða er ekki þannig. Ég legg til að við tökum okkur saman í mélkisusmettinu og uppfærum þessa síðu reglulega. Ekkert búið að gerast síðan á miðvikudag - skammarlegt.

Talandi um eitthvað skammarlegt. Það er nokkuð skammarlegt að vera gaurarnir í MR sem töpuðu byrir bifvélavirkjunum í gær. Maður er samt auðvitað hæstánægður með það. Pælið í því að þessir gaurar eiga eftir að vera þekktir í sögu MR sem gaurarnir sem TÖPUÐU í fyrsta skiptið í einhver ellefu ár.. Kæmi mér ekki á óvart þótt þeir verði kallaðir tapararnir miklu.

Ég og hún íðilfagra Berglind vorum að enduruppgvötva hinn forna og afar skemmtilega leik Yatzi og höfum spilað hann af kappi tvö kvöld í röð. Snilldar leikur... mæli með honum ef þið búið í litlu sjávarplássi úti á landi...

Í dag er miðvikudagur og sá dagur vikunnar er vissulega dagur tónlistargetrauna. Hér er ein slík.

Hver er sveitin og hvað nefnist þetta þekkta lag?
“When routine bites hard, and ambitions are low
And resentment rides high, but emotions won't grow
And we're changing our ways, taking different roads”

Hverjir eru þetta og hvert er lagið?
“Father wears his Sunday best
Mother's tired she needs a rest
The kids are playing up downstairs
Sister's sighing in her sleep
Brother's got a date to keep
He can't hang around”

Rúsínan í pylsuendanum í þetta skiptið er svo ‘súkkulaðikleinan’. Hæfni manna er misjöfn og legg ég áherslu á að allir fái verkefni við sitt hæfi. Ég minni á að öllum öðrum en Togga er meinað að taka þátt í umræddri kleinu. Súkkulaðikleinan hljóðar svona:

Í hvaða hljómsveit voru Bítlarnir John, Paul, Ringo og George?